हेलम्बुकाे शैक्षिक प्रगति, लगानीकाे प्रतिफल भित्रदै

सिन्धुपाल्चोक – हेलम्बु गाउँपालिकाकाे हालै सार्वजनिक भएको आधारभूत शिक्षा  परीक्षा (कक्षा ८) को पालिका स्तरीय नतिजामा हेलम्बु गाउँपालिका–२ स्थित बोधिसत्व मोडेल माध्यमिक विद्यालयले शतप्रतिशत नतिजा हासिल  गरेको छ।
२०८१सालको परीक्षामा सहभागी २६९ जना विद्यार्थीमध्ये २४३ जनाले परीक्षा उत्तीर्ण गरेका छन्। भने गणित विषयमा विद्यार्थीहरूले उत्कृष्ट अङ्क पाएका छन्। गणितमा ७१ जनाले A+, ८२ जनाले A, र ३५ जनाले B+ ग्रेड प्राप्त गरेकाे विद्यालयले जनाएको छ ।

विद्यालय प्रशासनले यो सफलताको श्रेय विद्यार्थीको निरन्तर मेहनत, शिक्षकहरूको समर्पण, प्रविधिमैत्री शिक्षण पद्धति, र अभिभावकहरूको सक्रिय सहभागितालाई दिएको छ।
बोधिसत्व मोडेल माविमा शिक्षा सुधारको अभियान अन्तर्गत नियमित अतिरिक्त कक्षा, डिजिटल माध्यम प्रयोग, र विद्यार्थी–शिक्षक अन्तरक्रियामा जोड दिइँदै आएको छ। यही रणनीतिक कार्यान्वयनकै परिणामस्वरूप विद्यालयले यो उत्कृष्ट नतिजा ल्याउन सफल भएको हो। सामुदायिक विद्यालयमा हेलम्बुको यो नतिजा सम्भवत: नेपालकै उत्कृष्ट हुन सक्ने गाउँपालिकाले जनाएको छ ।

हेलम्बु गाउँपालिकाको शिक्षा शाखाले बोधिसत्व विद्यालयको यो उपलब्धिलाई क्षेत्रीय शैक्षिक क्षेत्रमै प्रेरणादायक उपलब्धि भएको बताएको छ। गाउँपालिकाका अध्यक्ष निमा ग्याल्जेन शेर्पाले विद्यालयको सफलताले अन्य शैक्षिक संस्थाहरूलाई पनि गुणस्तर सुधारतर्फ अग्रसर गराउने विश्वास व्यक्त गरे ।

“हामीले शिक्षामा निरन्तर लगानी गर्दै आएका छौं। शिक्षक, विद्यार्थी र अभिभावकबीचको सहकार्यले आजको यो उपलब्धि सम्भव भएको हो,” अध्यक्ष शेर्पाले भने । उनका अनुसार, गाउँपालिकाभित्रका अन्य विद्यालयहरूमा पनि क्रमशः सुधार देखिन थालेको छ।