हुतराज अर्धचन्द्र पुरस्कारबाट कसजू र पाख्रिन पुरस्कृत

मेलम्ची ।

हुतराज अर्धचन्द्र पाण्डे स्मृति पत्रकारिता पुरस्कारबाट सिन्धुपाल्चोकका अग्रज पत्रकार सुरेश कसजू र कमला पाख्रिन पुरस्कृत भएका छन् ।

कसजू र पाख्रिनलाई जनही रु ५ हजार १ सय नगदसहित आज पुरस्कृत गरिएको हो ।

इन्द्रेश्वरी माध्यमिक विद्यालय मेलम्चीको वार्षिकोत्सव समारोहमा यो पुरस्कार प्रदान हुँदै आएको छ । यो वर्ष पनि पत्रकारिताको क्षेत्रमा विशेष योगदान गरेबापत कसजू र पाख्रिनलाई पुरस्कृत गरिएको हो ।

पुरस्कृत कसजू जिल्लाका पुराना पत्रकार हुन् । २०४६ सालमा विप्लव मासिक पत्रिकाको प्रकाशन र सम्पादनमार्फत पत्रकारितामा प्रवेश गर्नु भएका कसजू त्यसयता सिन्धु सन्देश मासिक, सिन्धु सन्देश साप्ताहिक, सर्वपक्ष पाक्षिक हुँदै हाल जुगल खबर डटकम, सर्वपक्ष दैनिकका प्रकाशक एवम् सम्पादकको भूमिकामा रहनु भएको छ ।

गोरखापत्र संस्थानका पूर्व वोर्ड सदस्यसमेत रहनु भएका कसजू हाल नेपाल पत्रकार महासंघ, सिन्धुपाल्चोकका सल्लाकार, प्रेस सेन्टर नेपाल, सिन्धुपाल्चोकका सल्लाकार समेत रहेका छन् ।

त्यस्तै पुरस्कृत पाख्रिन भ्वाइस अफ युथ रेडियो, रेडियो सिन्धु हुँदै हाल कान्तिपुर टेलिभिजनमा कार्यरत छिन् ।